有無咁抵呀，四十二蚊一個酒店任取任食自助早餐！
都係老婆仔叻叻豬，搵到呢間大角咀酒店嘅優惠，只需要like呢間酒店餐廳「壹壹漁一」嘅 facebook或者ig，就可以以優惠嘅價錢，港幣 $38享用到這裡的任取任食自助早餐，加埋一都係四十二蚊，真係幫襯翠華、華星、敏華既港式早餐都差唔多價錢啦，你話仲唔係超值！
餐廳地方唔太大，晚市係做泰國同中國fusion菜嘅，早餐就做自助餐，星期一到星期日都有得食，時間由早上六點半到十點半，如果早來食嘅話，可以食足四個鐘頭，酒店住客都係收優惠價五十蚊啫。我同老婆仔呢日來到，差唔多八點半，好彩仲有位，可以即時入內，到我地食完早餐，差唔多九點半，外面已經有人喺度等位了。
呢度環境ok，雖然佈置簡單，人唔多時坐得都算舒服，有香港人，有大陸人，仲有外國人添，應該都係住喺呢間酒店嘅住客嘞。
有咩嘢食？四十幾蚊嘅酒店自助早餐就唔會要求太高啦！不過都比一般嘅早餐豐富好多，有開胃沙律、有可以落菜甫、花生嘅稠身白粥、有無落糖嘅健康麥皮、有無咁健康炒蛋同健康尐嘅烚蛋、有茄汁豆、有煙肉、有火腿，有漢堡扒，不過就無腸仔。有多士爐可以烘多士搽牛油或者果占、有芥蘭炒飯同豉油皇炒麵、有春卷、有薯條、有燒賣、有中式蛋糕仔、仲有泰式魚餅。飲品方面都有鮮奶、果汁、咖啡、茶等選擇，咁多嘢食，食物質素及格，仲可以食足四個鐘，仲唔係抵到爛？
餐廳名稱：壹壹漁一
餐廳地址：大角咀大角咀道88號旺角帝盛酒店2樓
美味度：60/100
沒有留言:
張貼留言